Zréck op de Blog
Ech war d’lescht Weekend Laser Tag spillen. Zanter ech „How I Met Your Mother“ gekuckt hunn, wollt ech dëm Barney säi Liblingsspill onbedéngt emol ausprobéieren. Am Verglach mat Paintball ass et éischter e Spill fir Kanner, awer et ass interessant, wat ee sou iwwer Business léiere kann, wann een am Däischtere mat enger Laserpistoul ronderëmleeft.
Eng faszinéierend Saach beim Laser Tag sinn déi verschidde Modussen, déi ee spille kann. Mat all Modus ännert sech d’Stëmmung am Raum, d’Musek an et ginn nei Spezialfunktiounen dobäi. Och d’Däischtert am Raum an d’Siichtbarkeet vun de Spiller ännert sech – et ass net ëmmer kloer, wien an wei engem Team ass.
An eiser Arena gouf et zwou Versioune fir d’Siichtbarkeet – Tron a Swat. Am „Tron“-Modus ass d’Liicht un an d’Spiller liichten iwwerall an hire jeeweilege Faarwen; et gesäit aus wéi am Film Tron. Am „Swat“-Modus ass et komplett däischter. D’Spiller blénken nëmmen heiansdo kuerz op an ee kann nëmmen seng Täscheluucht benotzen. Een erkennt net, mat wiem ee spillt, wou d’Géigner sinn a meeschtens net emol, vu wiem ee getraff gouf. Dat huet mech staark drun erënnert, wouhin de Maart an bal all Segment tendéiert.
Wat huet dat mat Business ze dinn?
Fréier war de Business am „Tron“-Modus – et war kloer, wien d’Konkurrenz war, wéi hir Positionéierung ausgesinn huet an a wéi enge Zyklen hir Kampagnen gelaf sinn. Zum Beispill gouf et nëmmen e puer Biermarken vun e puer bekannte Brauereien. Dat war d’Konkurrenz – et war ganz kloer an einfach. Awer dunn koumen Radler, Cider, IPAs, Ales, Mikro-Brauereien, Eegebemarken… De Maart gëtt weder duerch d’Gréisst vun de Regaler nach duerch physesch Grenze limitéiert, well et an Online-Shops Millioune vu Biermarken ka ginn. An net nëmmen aner Marken sinn d’Konkurrenz – mee och Wäin, Cocktailen an alkoholfra räi Gedrénks. Dofir ass et vill manner kloer, wéi de Maart ausgesäit a wouhin en sech entwéckelt. An domat ass de Business quasi an de „Swat“-Modus gewiesselt.
Wéi gewënnt een d’Spill, wann ee quasi näischt gesäit?
Am „Tron“-Modus, wou ee gesäit, ka mat verschiddene Strategien erfollegräich sinn. Zesummen no vir goen, d’Beweegunge vum Géigner kontrolléieren oder sech op enger Positioun verstoppen a snipen. Datselwecht gëlt am Business – mat der Konkurrenz innovéieren, e bessere Präis hunn oder eng staark Maartpositioun duerch e Patent oder en anere Virdeel (besser Distributioun, bessere Point of Sale, staark Brand asw.) hunn.
Am „Swat“-Modus (wann et komplett däischter ass an ee seng Géigner kaum gesäit) gëtt et nëmmen eng Gewënnerstrategie: a Beweegung bleiwen an op alles schéissen. Genau wéi am Business – betruecht jiddereen als Konkurrenz an hält ni op mat innovéieren. Den eenzegen Zweck ass et, d’Zil ze treffen – dat, wat d’Leit wëllen.
Wann eng Brand op der Plaz bleift, gëtt se liicht kopéiert, iwwerholl oder d’Leit verléieren den Interessi, well d’Welt sech konstant verännert.
E super Beispill ass Nokia. Mengt Dir, hir Manager hätten Apple, Google oder Samsung am Joer 2007 als Konkurrenz betruecht? Ech mengen net, datt hinnen iwwerhaapt de Gedanken komm ass, datt se net méi „Tron“ géint Sony-Ericsson a Motorola spillen, mee an enger „Swat“-Arena sinn. Wéi d’Liicht ugang ass, war d’Spill fir si scho laang eriwwer.
D’Laser Tag Arena huet mir d’Ae geöffnet. Ech recommandéieren Iech, et selwer ze spillen an déi verschidde Modussen auszeprobéieren. Wann Dir näischt fir de Business dovunner mat huelt, hutt Dir op d’mannst Spaass gehat. Genau wéi de Barney Stinson.
